Regnante illustrissimo rege sancto erico in Swecia Venerabilis pontifex beatus Henricus in anglia oriundus conspicuus vite sanctitate et morum honestate preclarus Upsalensem regebat ecclesiam Quibus quasi duobus magnis luminaribus populus terre illius ad veri dei noticiam & cultum magis magisque illustrabatur iugiter ac informabatur Sanctus autem rex insignem pontificem vita & moribus et eclesiastice dignitatis culmine praepollentem intimi amoris amplexatur affectu & sue specialis familiaritatis gratia plurimum honorabat Felix patria quam diuina maiestas concesserat talium ac tantorum rectorum eodem tempore moderamine gubernari Non erat tunc formidini ut regnum in se diuisum desolaretur dum ad gloriam dei & iustum tranquillumque regimen subditorum capita populorum tam concorditer convenerunt Edificabatur ecclesia illo in tempore crescens in timore dei rectificabantur leges quas simplex antiquitas vel minus recte condiderat vel obliquauerat perversitas malignorum Studebatur paci et iusticie subditorum lupi rapaces dentes venenatos in insontes acuere non audebant Cum rex sedens in solio intuitu suo omne malum dissiparet et bonus pastor viriliter vigilaret super custodiam gregis sui Cum vero plebs finlandie tunc ceca et crudelis gentilitas Habitantibus in swecia gravia dampna frequenter inferrent Sanctus autem rex ericus assumpto secum ab ecclesia Upsalensi beato Henrico collecto exercitu contra nominis Christi et populi sui inimicos expedicionem dirigit Quibus potenter fidei Christi et suo subiugatis dominio ad sweciam Cum gloriosa palma triumphi remeauit Beatus autem Henricus Vinee domini cultorem et custodem ad irrigandum ymbre celestis doctrine nouellas neophitorum plantulas et ad corroborandum dei cultum in patribus illis audacter remansit non metuens se quibuslibet aduersis exponere ut possit gloriam dei dilatare O quantus fidei feruor quantus ardor diuini amoris altare aureum cordis deuotissimi pontificis accenderat qui postpositis opulenciis rerum et amicorum solaciis et Upsalensis presulatus sede sublimi pro paucarum et pauperum ouium saluacione multis se mortis periculis exponebat Illius imitacione pastoris qui relictis nonaginta nouem ouibus in deserto unicam errantem sollicite requisiuit et inuentam ad ouile propriis impositam humeris reportauit Cum vero edificacioni & confirmacioni finlandensis ecclesie prudenter & fideliter insudaret Accidit ut homicidam quendam ob ipsius facinori immanitatem ecclesiastica disciplina vellet corrigere ne facilitas nimia venie incentiuum preberet delinquendi Quod salutis remedium infelix vir sanguinum contempsit & in sue vertit dampnacionis augmentum odio habens se salubriter arguentem In ministrum itaque iustitie & in sue salutis zelatorem funestus insiluit ipsumque crudeliter trucidauit Sic sacerdos Domini acceptabilis hostia diuinis oblata conspectibus occumbens pro iustitia templum superne iherusalem cum gloriosi palma triumphi feliciter introivit Postmodum ille scelestus occisor tollens de capite sancti pontificis birretum quod gestare consueuerat suo imposuit capiti et regressus domum de commisso flagicio se iactans quod ursum prostrasset per hoc significans occisionem sancti viri letabatur cum male fecisset et exultabat in rebus pessimis Dum autem birretum quod in suo posuerat capite amovere temptaret cutis et caro birreto coheserunt et illa insimul a testa capitis amovebat Congrua profecto divine ulcionis vindicta ut tali pena puniretur qui non est veritus Christum domini truculenter inpetere et occisum spoliare Digitus martyris gloriosi in hyeme abscisus longe post in vere cum ubique glacies tota liquefacta et resoluta esset corvo super ipso crocitante cum annulo ipsius est inventus in quadam particula glaciei In villa kaysalum pater et mater cum filium mortuum pararent ad involvendum invocabant patrocinium beati Henrici Cumque fecissent sancto pro eo votum qui iacebat mortuus mox revixit Filia antonis de vemo lucia nomine cum defuncta a parentibus plangeretur ad invocationem beati Henrici subito restituta est vite pariter et saluti Mulier quaedam in sastamalum per triennium langore gravi detenta sanctum Henricum invocavit votum fecit et sanitati restituta plene convaluit sine mora Frater quidam ordinis minorum sacerdos et predicator officio erlendus nomine per sex annos passus est dolorem capitis uehementem qui in uigilia beati Henrici uotum votum fecit quod si ab illa passione per ipsius auxilium liberaretur ante corpus sancti in signum gracie sibi facte caput de cera factum suspenderet et martyrem deinceps in reuerencia ampliori semper haberet a longo langore capitis fuit protinus liberatur Quedam mulier in kyrio grauem cecitatem passa est per annum uouens peregrinacionem et inuocans sanctum Henricum uisum recepit Quidam in kyrio habens unum pedem contractum grauiter uouit peditando uisitare reliquias beati Henrici si meritis eius curacionis beneficium obtineret quem martyr insignis ab illa contractione miserabili misericorditer mox sanauit CUm filia primogenita ingonis seruitoris cuiusdam ecclesie letali infirmitate laboraret ad morten pater dolens diuersis sanctis pro curacione filie sue uotum fecit nec affuit remedium Et cum filiam quasi mortuam ad terram posuisset ei pre nimia fatigacione et moerore uelut obdormienti quedam persona spectabilis in uisione dixit Quare non inuocas sanctum Henricum Cui euigilanti eciam mulier prouecte etatis assistebat et dixit Fac uotum sancto Henrico ipse enim uult habere uotum tuum Vouit ille quod filia sua annis singulis semper uigiliam martyris ieiunaret et corpus sancti cum oblacionibus uisitaret et ipse et mater puelle pro ea uotum complerent Quo facto puella surrexit sanitate plene restituta QUidam homines de kwmo in captura focarum in medio maris existentes quassati nimia tempestate personarum perdicionem et amissionem rerum timentes sanctum Henricum inuocabant et continuo tranquillitas facta est in mari et ipsi mortis periculum euaserunt Gudmundus famulus domini aboensis cum uenisset ad vesgociam ad sacerdotem in sandheem et in sero bibisset memoriam beati Henrici sacerdos hoc audiens derisit et dixit Si ille est sanctus irascatur michi si potest Sequenti nocte iacens in lectulo nimio cepit cruciari tumore corporis et dolore intelligens derisionis aduenisse quam optauerat iram predictum gudmundum uocauit de facta derisione penituit sanctum Henricum ad sui curacionem inuocauit uotum recit quod uigiliam eius ieiunaret omnibus diebus uite sue et continuo sancti Henrici auxilio est liberatus Hiis et aliis quam plurimis signis et prodigiis mirificauit Dominus sanctum suum et uenerabilem ac colendum exhibuit uniuersis